षंढ

विषण्ण करतात संध्येला
षंढ जमतात जेव्हा सर्व
जमवून घेतात आपले पेले
चालवतात आपापले तर्क

पळसाला का पाने तीन
विवाहपूर्व लैंगिक संबंध हीन
स्पर्शतात ते सर्व विषयांना
भेदत नाही कधीच कोण

उसळतात पण विरतात त्यांचे
धुमसत नाहीच कधीच निखारे
तरूण वयातच जोश संपलेले
वाटतात सारे जख्खड म्हातारे

ग्रहण लागलेले सूर्य तुम्ही
फेकून द्या सर्व आचार
जगण्यासाठी मरून पहा एकदा
मगच करा जगाचा विचार...